Paperezko Lagunak: Su Zelaiak

Trinitate kaleko 7. zenbakiko urteko lehen irakurle bilerak Mikel Peruarenaren 'Su Zelaiak' (Susa) eleberria izango du mintzagai Alex Gurrutxaga artzaiaren makilapean. Lagun arteko literatur solasaldi irekiak, ardoaz eta saltxitxoiaz goxatuta.

Lehen Mundu Gerrako bataila eta triskantzetan Euskal Herriko 6.000 lagun hil ziren, eta beste milaka batzuk era lazgarrian hondatu: itsu, maingu, herren, zoro. Belaunaldi oso bat sakrifikatu zen.

Baionako Infanteriako 49. Erreximenduaren ibilerak aletuz, krudelkeria neurririk gabeko haren kontakizun gordina dakar Mikel Peruarena Ansaren bigarren nobelak. Soldadu saldoa duzu protagonista, infernuko zelaietan sarraski kolektibo batean kiskalia. Eta soldadu haien guztien artean da Filipe Luro ikazkina ere.